“Hýuston Rokets” basketbol klubunyň oýunçysy Kewin Dýurant 2027/28 möwsüminde oýunçy hukugy bilen 90 mln dollara şertnamany ýene iki ýyl uzaltmaga razy boldy. Bu barada onuň hyzmatdaşy we Boardroom-yň baş direktory Riç Kleýman aýtdy diýip, ESPN habar berýär.
Indi Dýurant häzirki we geljekki tölegleri göz öňünde tutup, karýera gazanjynyň umumy mukdary boýunça NBA-nyň oýunçylarynyň reýtinginde birinji orny eýeleýär – 598,2 mln dollar. Ol bu görkeziji boýunça “Los-Anjeles Leýkersiň” oýunçysy Lebron Jeýmsden ($583,9 mln) öňe geçdi.
Kleýmanyň aýtmagyna görä, Dýurant şertnamany 120 mln dollara hem uzaldyp bilerdi, ýöne klubuň maliýe çeýeligini saklamagy we iki tarapyň hem uzak möhletli geljekde hyzmatdaşlyk edip bilmegi üçin ylalaşyk etdi. Şu möwsümde ol 54,7 mln dollar gazanýar, onuň şertnamasy bolsa üç ýyllyk bolup, 144,7 mln dollara barabar.
“Rokets” Dýuranty iýulda ýedi toparyň: “Atlantanyň”, “Brukliniň”, “Golden Steýtiň”, “Leýkersiň”, “Minnesotanyň” we “Finiksiň” gatnaşmagynda NBA-nyň taryhynda iň uly şertnamanyň çäklerinde satyn aldy. Bu hem geçen möwsümde Günbatar konferensiýasynda ikinji orny eýelän “Roketsi” NBA-nyň çempiony titulyna hakyky dalaşgär derejesine çykardy.
Dýurant taryhda ýeke-täk dört gezek basketbol boýunça Olimpiýa çempionydyr. Ol iki gezek NBA-nyň finalynyň iň gymmatly oýunçysy diýlip ykrar edildi we 15 gezek Ähli ýyldyzlaryň oýnuna gatnaşdy. Ozal ol “Oklahomada”, “Bruklinde”, şeýle-de “Golden Steýtde” çykyş etdi. Soňkusy bilen iki gezek çempion boldy.
