Argentinanyň milli ýygyndysynyň 38 ýaşly hüjümçisi Lionel Messi milli ýygyndy üçin oýunlarda assist boýunça täze dünýä rekordyny goýdy.
15-nji oktýabrda Fort-Loderdeýlde (Florida, ABŞ) Argentinanyň milli ýygyndysy ýoldaşlyk oýnunda Puerto-Rikony 6:0 hasabynda utdy.
Oýunda Aleksis Makallister we Lautaro Martines iki gol geçirdi, ýene bir goly Gonsalo Montiel girizdi. Bir goly bolsa garşydaş toparyň goragçysy Stiwen Eçewarriýa öz derwezesine saldy. Messi gol geçirmedi, ýöne iki gezek – Montiele we Martinese kömek etdi. Bu hem oňa milli ýygyndy üçin assistleriň umumy sanyny 60-a ýetirmäge mümkinçilik berdi.
Ozal bu görkeziji boýunça ol öňdebaryjylygy amerikaly Lendon Donowan we braziliýaly Neýmar bilen paýlaşýardy. Olaryň hasabynda 58 assist bardy (başga maglumatlar boýunça, Neýmarda 59 assist).
Karýerasynyň dowamynda Messi ähli möhüm kuboklary – 2022-nji ýylyň dünýä çempionatyny, 2021-nji we 2024-nji ýyllarda Amerikanyň Kubogyny, 2022-nji ýylda Finalissimany, 2008-nji ýylyň Olimpiadasyny, dört Çempionlar ligasyny we on gezek Ispaniýanyň çempionatyny utdy. Ol “Altyn topuň” sekiz gezek eýesidir.
Şol bir wagtyň özünde, onuň hemişeki garşydaşy Kriştianu Ronaldu hem dünýä çempionatynyň saýlama ýaryşlaryndaky gollary boýunça (41 gol) täze rekord goýdy. Ol DÇ-2026-nyň saýlama ýaryşynda Wengriýa bilen oýunda iki gol geçirdi (2:2). Onuň hasabynda milli ýygyndy üçin jemi 143 gol bar – ol milli toparlaryň taryhynda iň gowy bombardir bolup galýar we Messiden 29 gol öňde barýar. Ýöne DÇ-däki gollarynyň sany boýunça Ronaldu top-20-ä girmeýär – onuň hasabynda sekiz gol bar. Messi 13 gol bilen dördünji orny eýeleýär.
