Altynyň bahasy ilkinji gezek bir unsiýa üçin 4000 dollardan geçdi. 7-nji oktýabrda, sişenbe güni söwdada altyn üçin dekabr fýuçersleri Nýu-Ýorkuň haryt biržasynda (COMEX) 0,6% gymmatlap, bir unsiýa üçin 4000,1 dollara ýetdi.
7-nji oktýabrda Aşgabat wagty bilen 11:00-a çenli baha bir unsiýa üçin 3949,8 dollara düşdi.
Gymmat bahaly metal üçin isleg ABŞ-da 1-nji oktýabrda kongres býujeti ylalaşyp bilmänsoň başlan şatdaun sebäpli ýokarlandy. Netijede, döwlet işgärleriniň köpüsi tölegsiz rugsada iberildi, has möhüm işgärler bolsa zähmet haksyz işlemegini dowam etdirýär. Reuters-iň maglumatlaryna görä, kongresiň palatalarynyň arasyndaky gepleşikler şowsuz boldy, bu hem altynyň bahasynyň ösmegine ýardam etdi.
Ýagdaýa Fransiýadaky we Ýaponiýadaky syýasy çökgünlikler hem täsir edýär. Fransiýanyň premýer-ministri Sebastýen Lekornýu býujet çykdajylaryny ylalaşmak synanyşygy şowsuz bolandan soň işden çekildi. Ol bu wezipede bary-ýogy 27 gün boldy. Ýaponiýada premýer-ministr Sigeru Isiba Ýaponiýanyň dolandyryjy Liberal-demokratik partiýasynyň dargamagynyň öňüni almak üçin wezipeden gitdi. Indi ýurduň premýer-ministri LDP-niň täze başlygy Sanae Takaiti bolup biler. Ol Ýaponiýanyň taryhynda bu wezipede ilkinji aýal bolar.
Bloomberg bahalaryň ösüşine ösüp barýan ýurtlarda merkezi banklar tarapyndan altynyň işjeň satyn alynmagynyň, şeýle-de altyn birža gaznalaryna maýa goýumlaryň ýokarlanmagynyň hem goldaw berendigini belleýär.
