Häzirki wagtda internet durmuşymyzyň aýrylmaz bölegine öwrüldi, ýöne onuň bahasy dürli ýurtlarda ep-esli tapawutlanýar.
“We Are Social” guramasynyň maglumatlaryna esaslanýan infografika, 2025-nji ýylda 60-dan gowrak ýurtda bir sekuntda megabit üçin giň zolakly internetiň bahasynyň näderejede tapawutlanýandygyny görkezýär.
Internet iň gymmat bolan ýurt — Birleşen Arap Emirlikleri, bu ýerde ortaça bir megabit üçin bahasy 4,31 dollar. Bu bolsa ikinji orunda gelen Gana bilen deňeşdirilende iki esse köpräk (Ganada 2,58 dollar). Emirliklerde şeýle ýokary nyrhlar bazardaky bäsdeşligiň azlygy, infrastruktura aýratynlyklary we kadalaşdyryjy düzgünler bilen düşündirilýär.
Gymmat internetli ýurtlaryň hatarynda Şweýsariýa, Keniýa we Marokko hem bar — bu ýurtlarda megabit üçin bahasy 1 dollardan geçýär.
Munuň tersine, gündogar Ýewropa ýurtlarynda internet diýseň arzan:
Rumyniýada — 0,01 dollar, Russiýada — 0,02, Polşada — 0,03 dollar.
Şeýle hem, Aziýanyň käbir ýurtlarynda hem internet örän elýeterli — Wýetnam, Hytaý we Günorta Koreýada bir megabit üçin bahasy diňe 0,05 dollar bolup biler.
ABŞ we beýleki ösen ýurtlar, mysal üçin, Fransiýa, Ýaponiýa we Germaniýa, dünýä boýunça ortaça görkezijiden (ýagny 1 megabit üçin 0,42 dollar) pes nyrhlarda internet hödürleýärler.
