Samsung Galaxy Ring-i ulanyjylaryň biriniň ýüzük barmagynda wagty litiý-ion batareýasy çişdi, şol sebäpli ýüzük onuň barmagyny pugta gysdy we ahyrynda ony aýyrmak üçin lukmanyň kömegi gerek boldy. Waka uçara münmezden öň bolup geçdi, şol sebäpli ýolagçy uçuşyny-da sypdyrdy.
Bu ýagdaý dakylýan gurluşlarda akkumulýatorlaryň ygtybarlylygy barada ýene sorag döretdi.
9to5Google neşiriniň habar bermegine görä, Deniel atly ulanyjy gezelenç wagty Galaxy Ring-iň birden çişip başlandygyny gürrüň berdi. Batareýa ulalyp, ýüzügiň içki bölegini barmaga tarap gysdy. Korpusyň titandan ýasalandygy üçin metal daşyna çykman, ähli basyş içine – barmaga tarap gönükdirilipdir. Netijede, ýüzük barmagy berk gysan. Bu X sosial ulgamynda ýerleşdirilen suratda hem görünýär.
Denieliň aýtmagyna görä, waka uçuş üçin hasaba alyşdan öň bolup geçdi. Awiakompaniýanyň işgärleri oňa çişen litiý-ion batareýasy sebäpli borta münmäge rugsat bermedi. Ahyrynda ol hassahana ýüz tutup, ýüzügi aýyrtdy.
Bu Galaxy Ring-iň akkumulýatorynyň mälim bolan ikinji çişme ýagdaýydyr. Ozal täze diýen ýaly ýüzükde şuňa meňzeş meseläniň bolandygy habar berildi. Iki ýagdaýda-da datçigiň garşysyndaky ýüzügiň içki bölegi ulalyp, barmagy gysdy.
Şeýle meseleler Samsung üçin täzelik däl. 2016-njy ýylda Galaxy Note 7 smartfonlarynyň batareýasynyň ýanmagy we çişmegi sebäpli ABŞ-nyň Federal raýat awiasiýa edarasy (FAA) olary uçuşlara almagy gadagan etdi – bu gadaganlyk häzirem hereket edýär.
Soňky waka barada Samsung entek resmi teswir bermedi, ýöne habar berlişi ýaly, kompaniýanyň wekilleri eýýäm sosial ulgam arkaly zyýan çeken bilen habarlaşypdyr.
