Boeing korporasiýasy 737 MAX-yň ornuny tutjak täze inçe fýuzelýažly uçaryň üstünde işläp başlady. Kompaniýa öňki modeliň howpsuzlygy bilen bagly meselelerden soň bazardaky ornuny dikeltmäge çalyşýar diýip, The Wall Street Journal habar berýär.
Neşir çeşmeleriniň maglumatlaryna görä, 2025-nji ýylda Boeing-iň ýerine ýetiriji müdiri K.Ortberg uçar üçin täze hereketlendiriji barada maslahatlaşmak üçin Beýik Britaniýada Rolls-Royce-yň wekilleri bilen duşuşdy. Şeýle-de, täjirçilik uçarlaryny öndürmek boýunça täze uly menejer bellendi. Boeing geljekki inçe fýuzelýažly uçar üçin uçarmanlar kabinasyny taýýarlaýar. Häzirki wagtda taslama irki tapgyrda.
Ortberg 737 MAX-yň ornuny tutjak model barada giňişleýin maglumat bermedi, ýöne hil we önümçilik bilen bagly uzak möhletli meseleleri çözmegiň, şeýle-de maliýe durnuklylygyny berkitmegiň kompaniýa üçin ileri tutulýan ugurlardygyny belledi. Boeing-iň beýanynda korporasiýanyň 6 müň uçary ýola goýmak we eýýäm yglan edilen modelleri şahadatnamalaşdyrmak ýaly dikeldiş meýilnamasyny durmuşa geçirmegi dowam etdirýändigi aýdylýar.
Mundan öň Boeing şu ýylyň ikinji çärýeginiň netijeleri barada hasabat berdi. Çärýek ýitgisi 2024-nji ýylyň degişli döwründäki 1,09 mlrd dollar bilen deňeşdirilende 176 mln dollar boldy. Girdeji analitikleriň çaklamasyndan ýokary bolup, 35% ösüş bilen 22,75 mlrd dollar boldy.
