Škoda Auto kompaniýasy kuzowyň täze boýagy – “Matte Grey” ýylpyldysyz reňki bilen Elroq RS elektrik krossoweriniň hataryny giňeltdi. Bu ýylpyldamaýan boýag tehnologiýasynyň häzirki modelde ilkinji gezek ulanylmagy boldy. Ol üpjün edijiler we kompaniýanyň içerki bölümçeleri bilen bilelikde işlenip taýýarlandy.
Ýylpyldysyz effekt kremniý dioksidiniň nanobölejiklerini saklaýan dury üstki gatlagyň hasabyna gazanylýar. Bu bölejikler ýagtylygy dargadýar, şol sebäpli kuzowyň ýüzi ýylpyldysyz görünýär. Şol bir wagtyň özünde boýag mehaniki zeper ýetmelere ýokary derejede durnuklydyr.
Awtomobiller daşalanda kuzowy goramak üçin Škoda tutuş ulagy ýapyp, zeper ýetmek töwekgelçiligini azaldýan ýörite “daşlygy” ulanýar.
Elroq taslamasynyň ýolbaşçysy Weronika Straşkrabowanyň aýtmagyna görä, kompaniýa müşderiler tarapyndan islegiň ýokarydygyny göz öňünde tutup, ýylpyldysyz reňkleriň toplumyny giňeltmegi meýilleşdirýär.
Škoda Elroq RS hatarda iň ýokary wersiýadyr. Elektrokrossower umumy kuwwaty 340 at güýjüne barabar bolan iki hereketlendiriji bilen üpjün edildi, 100 km/sag çenli tizligini 5,4 sekuntda artdyrýar, iň ýokary tizligi 180 km/sag bilen çäklendirilýär. Bir zarýadda geçýän ýoly WLTP sikli boýunça 550 km ýetýär.
