16-njy sentýabrda 2025/2026 möwsüminiň UEFA-nyň çempionlar ligasynyň umumy tapgyrynyň ilkinji oýunlary başlady.
Oýun gününiň esasy täsirli wakasy Lissabondaky duşuşyk boldy, bu ýerde “Karabah” ýerli “Benfikany” 3:2 hasabynda utdy. Azerbaýjan topary üçin bu ýeňiş taryhy boldy – ol öz taryhynda ilkinji gezek Çempionlar ligasynyň esasy tapgyrynyň oýnunda ýeňiş gazandy. 16-njy minuta çenli ýer eýeleri hasaby 2:0 etmek bilen, megerem, uly ýeňşe garaşdy. Ýöne 30-njy minutda “Karabahyň” oýunçylary aratapawudy azaltdy, 48-nji minutda hasaby deňledi, oýnuň ahyrynda bolsa (86-njy minut) öňe çykdy.
Tiz wagtdan “Benfikanyň” prezidenti Ruý Koşta toparyň baş tälimçisi Brunu Laženiň işden çykarylandygyny habar berdi. Ol kluba 2024-nji ýylyň sentýabryndan bäri ýolbaşçylyk edipdi. Geçen möwsüm onuň ýolbaşçylygynda “Benfika” ýaryşyň 1/8 finalyna çykyp, “Barselonadan” iki duşuşygyň jemi boýunça utuldy (1:4).
Oýun güni başga-da kambekler boldy. “Ýuwentus” Dortmundyň “Borussiýasyna” garşy oýunda Çempionlar ligasynyň taryhynda 94-nji minutda iki gol tapawudy bilen utulyp barýarka, ýeňlişden gaçmagy başaran ilkinji topar boldy. 93:12 we 95:22-nji minutlardaky gollar hasaby deňme-deň etdi – 4:4.
Madridiň “Realy” bilen “Marseliň” oýnunda fransuz kluby 22-nji minutda Timoti Weanyň goly bilen öňe çykdy. Ýöne “Real” Kilian Mbappeniň 29-njy we 81-nji minutlarda penaltiden iki gol salmagy netijesinde ýeňiş gazandy. Ahyrky hasap – 2:1. Ikinji goly madridliler Dani Karwahal meýdançadan çykarylandan soň azlykda oýnap saldy.
Galan oýunlaryň netijeleri:
- ·“PSW” (Niderlandlar) – “Ýunion” (Belgiýa) – 1:3
- ·“Atletik” Bilbao (Ispaniýa) – “Arsenal” (Angliýa) – 0:2
- ·“Tottenhem” (Angliýa) – “Wilýarreal” (Ispaniýa) – 1:0
Şu gün Çempionlar ligasy dowam eder we ýene alty oýun geçiriler:
- ·“Olimpiakos” (Gresiýa) – “Pafos” (Kipr)
- ·“Slawiýa” (Çehiýa) – “Budýo-Glimt” (Norwegiýa)
- ·“Aýaks” (Niderlandlar) – “Inter” (Italiýa)
- ·“Bawariýa” (Germaniýa) – “Çelsi” (Angliýa)
- ·“Liwerpul” (Angliýa) – “Atletiko” (Madrid, Ispaniýa)
- ·“Pari Sen-Žermen” (Fransiýa) – “Atalanta” (Italiýa)
