Los-Anjelesde amerikaly kinorežissýor Dewid Linçe degişli bolan üç jaýdan ybarat toplum satuw çykaryldy. Ol bu ýerde 35 ýyl ýaşap, “Malholland draýw” (Малхолланд драйв) we “Ýitirilen ýol” (Шоссе в никуда) ýaly filmlerini döretdi.
Bewerli Hillzdäki esasy jaý 1963-nji ýylda tanymal Frenk Lloýd Raýtyň ogly, binagär Lloýd Raýt tarapyndan taslandy. Soňra Linç oňa iki goňşy jaýy goşdy, olaryň biri “Ýitirilen ýol” filminiň käbir sahnalaryny düşürmek üçin ýer bolup hyzmat etdi. Toplumyň umumy meýdany 10 müň inedördül metrden geçýär.
Gozgalmaýan emläk 15 mln dollar diýlip bahalandyryldy.
Jaýlarda Asymmetrical Productions kinokompaniýasynyň ştab-kwartirasy, hususy montaž studiýasy we kinozal ýerleşdirilipdi. Interýer minimalistik bolup, geometrik şekilleri we üýtgeşik reňkleri utgaşdyrýar. Toplumyň çäginde baýra bakýan panorama penjiresi, peç, basseýn we iki gatly myhman jaýy bar.
Ozal, iýunda Linçiň 400-den gowrak şahsy goşlary The David Lynch Collection auksionynda satylypdy. Olaryň arasynda režissýorlyk kürsüsi, aýdym-saz gurallary, 150 müň dollara satylan tamamlanmadyk “Ronni Raket” filminiň ssenarisi we 40 müň dollara satylan 1977-nji ýylyň “Bozguç kelle” (Голова-ластик) filminiň 35 millimetrlik plýonkasy bar.
Dewid Linç 16-njy ýanwarda 78 ýaşynda aradan çykdy.
