Britaniýanyň Jaguar Land Rover awtoöndürijisi awgustyň ahyrynda bolan kiberhüjümden soň işini doly dikeldip bilenok. Kompaniýa hakerleriň käbir maglumatlara elýeterli bolandygyny habar berdi diýip, Bloomberg we BBC ýazýar.
BBC-niň maglumatlaryna görä, zawodlaryň işlemän durmagy sebäpli JLR-iň gündelik ýitgisi, takmynan, 5 mln funt sterlinge barabar. Şeýle hasaplary Land Rover-iň öňki baş inženeri Çarlz Tennant hödürledi. Ol günde ortaça 75 mln funt dolanyşykda kompaniýanyň Solihalldaky, Heýlwuddaky we Wulwerhemptondaky zawodlaryň durmagy, şeýle-de Slowakiýadaky, Hytaýdaky we Hindistandaky zawodlaryň işindäki bökdençlikler sebäpli uly puldan mahrum bolýandygyny aýtdy.
Ilkibaşda kompaniýa önümçilik ulgamlarynyň işine zyýan ýetse-de, hakerleriň möhüm maglumatlary alyp bilmändigini aýtdy. Bir ýarym hepdeden soň JLR Beýik Britaniýanyň maglumatlar boýunça komissar edarasyna hakerleriň käbir maglumatlara elýeterli bolandygy barada habar berdi. Syzma maglumatlaryň takyk göwrümi entek belli däl.
Kiberhüjümiň derňelmegi dowam edýär. Hüjümiň bolandygy baradaky fakt tassyklanandan soň, Jaguar Land Rover-iň eýesi Tata Motors hindi konserniniň paýnamalary 1% arzanlady.
