16 ýaşly amerikaly küştçi Abhimanýu Mişra täze dünýä rekordyny goýdy. Ol Samarkantda geçirilýän Grand Swiss ýaryşynda häzirki dünýä çempiony, 19 ýaşly Gukeş Dommarajuny utdy.
Mişra taryhda klassyk döwde dünýä çempionyny utmagy başaran iň ýaş oýunçy boldy. Öňki rekord Gata Kamskä degişli bolup, 33 ýyl saklanypdy.
Döw ýaryşyň bäşinji tapgyrynda boldy. Ol italýan döwünden başlady, soňra Mişra malyny pida etdi we oýun dartgynly göreşe geçdi. Dommaraju 61-nji göçümde utulandygyny boýun aldy. Bu döw garşydaşlaryň ýaşlygy sebäpli uly gyzyklanma döretdi.
Abhimanýu Mişra 2021-nji ýylda 12 ýyl 4 aý ýaşynda küşt wunderkindi hökmünde şöhrat gazandy. Şol wagt ol taryhda iň ýaş grossmeýster boldy. Bu görkeziji boýunça ol Sergeý Karýakiniň rekordyny täzeledi. Häzir onuň reýtingi 2600-den geçýär, ýöne entek dünýäniň iň güýçli küştçüleriniň ýüzlügine girenok.
Ýokarda agzalan Gata Kamskiý 1992-nji ýylda 17 ýaşynda şol döwürde karýerasynyň ýokary derejesine ýeten Garri Kasparowy utdy. Bu waka Kamskini dünýä çempionyny utan iň ýaş küştçi etdi. Onuň üstünligini otuz ýyldan gowrak wagt hiç kim täzeläp bilmedi.
Samarkantdaky Grand Swiss ýaryşy 15-nji sentýabra çenli dowam eder. Ýaryşyň baýrak gaznasy 625 müň dollara barabar. Ýeňiji 90 müň dollar alar, iň gowy iki küştçi bolsa dünýä çempiony adyny almak hukugy ugrunda dalaşgärleriň ýaryşyndan ýer alar.
