Huawei 2025-nji ýylyň II çärýeginde eplenýän smartfonlaryň dünýä bazarynyň 45%-ini eýeledi, bu hem öndürijileriň arasynda iň ýokary görkeziji boldy. Bu barada Counterpoint Research habar berýär. Geçen ýyl hytaý kompaniýasynyň paýy 32% boldy.
Hasabatyň maglumatlaryna görä, eplenýän smartfonlaryň umumy üpjünçiligi ýyllyk hasabynda 45% ýokarlandy. Ikinji orunda bir ýyl ozalky 14%-e derek 28% paý bilen Motorola ýerleşdi. Beýleki öndürijileriň umumy paýy 18% boldy. Geçen ýyl 21% bilen ikinji orny eýelän Samsung 2025-nji ýylyň II çärýeginde 9% bilen dördünji orna düşdi.
Gözlegde Motorola-nyň ösüşini amerikan bazarynyň üpjün edendigi bellenilýär.
“Motorola II çärýekde üpjünçiligi rekord derejä çykaryp, ABŞ-da eplenýän smartfonlaryň bazarynyň ösüşine ýardam etdi. Saýlanan baha syýasaty ösüşiň möhüm şerti boldy: Motorola Razr-yň esasy modeli 699 dollar bolup, bu ony ABŞ-da iň elýeterli eplenýän telefon etdi – häzire çenli hiç kim oňa golaýlaşyp bilmedi” – diýlip, Counterpoint Research hasabatynda aýdylýar.
Şol bir wagtyň özünde, III çärýekde hödürlenen Samsung Galaxy Z7 modelleri hasaba alynmady. Android Authority-nyň maglumatlaryna görä, Samsung awgustda meýilleşdirilen 320 müňe derek 430 müň Galaxy Fold7 çykardy, sentýabrda bolsa ilkibaşda meýilleşdirilen 200 müňüň deregine 260 müň smartfon çykarmak isleýär. Şol bir wagtyň özünde, Z Flip7 modelleriniň önümçiligi azaldyldy: awgustda kompaniýa meýilnama boýunça 340 müň däl-de, 270 müň smartfon çykardy, sentýabrda bolsa bary-ýogy 10 müň Z Flip7 FE smartfonyny çykarmagy göz öňünde tutýar.
