Seýrek ulaglaryň we superkarlaryň takyk miniatýura nusgalaryny ýasaýandygy bilen tanalýan Britaniýanyň Amalgam studiýasy täze modeli - 1:8 masştabdaky Aston Martin Valkyrie superkaryny hödürledi.
Beýik Britaniýada onuň bahalary 14 740 funt sterlingden (19 900 dollar töweregi) başlaýar, bu hakyky Dacia Sandero-niň bir komplektasiýasyndan bary-ýogy 25 funt sterling gymmat.
Stoluň üstünde goýulýan Aston Martin Valkyrie öndürijiniň asyl çyzgylaryny ulanyp we Aston Martin-niň dizaýnerleriniň gatnaşmagynda işlenip düzüldi. Taslama kompaniýa tarapyndan doly makullandy. Ony işläp düzmek üçin, takmynan, 3 müň adam sagady sarp edildi we her nusgany el bilen ýygnamak goşmaça 300 sagat wagt aldy.
Amalgam kupe we rodster görnüşinde Valkyrie-niň bary-ýogy 199 nusgasyny çykarmagy meýilleşdirýär. Esasy model Podium Green zawod öwüşgininde we gara salon bilen enjamlaşdyrylan görnüşde çykýar. 20 640 funta (27 900 dollar) ýörite boýag işi we içerki bezeg bilen doly şahsylaşdyrylan modeli sargyt edip bolýar.
