2-nji sentýabrda ABŞ-nyň Kolumbiýa okrugy boýunça Okrug kazyýetiniň federal kazysy Amit Mehta Google kompaniýasynyň monopoliýa garşy işiň çäklerinde Chrome brauzerini ýa-da Android operasion ulgamyny satmaga ýa-da bermäge borçly däldigi barada karar çykardy. Bu barada CNN habar berýär.
Şol bir wagtyň özünde, kompaniýa bäsdeşleriň käbir gözleg maglumatlaryna elýeterli bolmagyna mümkinçilik bermäge borçlandy. Şeýle-de, Google-a Chrome-y, Google Search gözleg ulgamyny, Google Assistant ses kömekçisini we Gemini programmasyny ýaýratmak bilen baglanyşykly aýratyn şertnamalary baglaşmak ýa-da uzaltmak gadagan ediler.
Bu korporasiýa garşy bäşýyllyk işiň netijesi boldy we maýadarlar üçin ol kompaniýanyň esasy önümleriniň satylyp bilinmegi babatyndaky howsalalary aradan aýyrdy. Şeýle-de, bu çözgüt Apple-iň we beýleki gurluş hem brauzer öndürijileriniň ýagdaýyny ýeňilleşdirýär, olar gözlegden gelýän girdejileri paýlamagyň çäklerinde Google-dan töleg almagyny dowam etdirer.
Kazyýet çözgüdi çykandan soň Google-yň paýnamalary 7,2%, Apple-iň paýnamalary 3% ýokarlandy.
Munuň bilen bir wagtda Ýewropa Bileleşiginiň häkimiýetleri mahabat tehnologiýalarynyň bazarynda agdyklyk ediji ornundan hyýanatçylykly peýdalanandygy üçin Alphabet-e jerime girizmegini soňa goýdy. Ýewrokomissiýanyň Tereza Riberanyň ýolbaşçylygyndaky monopoliýa garşy bölümçesi Google-a jerime salmagy we biznes modelini üýtgetmegi talap etmegi meýilleşdiripdi. Jerime baradaky çözgüt 1-nji sentýabrda güýje girmelidi, ýöne şeýle ädimleriň ABŞ tarapyndan jogap çärelerine getirip bilmeginiň öňüni almak üçin soňa goýuldy diýip, Bloomberg belleýär.
Ýatlap geçsek, 2024-nji ýylyň awgustynda kazy Mehta Google kompaniýasyny onlaýn gözleg we tekst mahabaty bazarynda monopoliýaçy diýip ykrar etdi. Muňa Apple, Samsung kompaniýalary we beýleki öndürijiler bilen köp milliardlyk şertnamalar esas bolup hyzmat etdi. Çünki, bu şertnamalar Google-yň gözleg ulgamynyň mobil platformalarda we brauzerlerde agdyklyk etmegine getirdi.
