MLS (ABŞ we Kanada) we MX ligasynyň (Meksika) klublarynyň arasyndaky futbol boýunça demirgazyk amerikan ýaryşynyň – Ligalaryň kubogynyň ýarym final oýunlary geçirildi. Aýgytly oýunda kubok ugrunda göreşmek hukugyny “Inter Maýami” we “Sietl Saunders” gazandy.
“Inter Maýami” Lionel Messi bilen ýarym finalda “Orlando Sitini” 3:1 hasabynda utdy. Duşuşyk Fort-Loderdeýldäki “Çeýz Stedium” stadionynda geçirildi.
Oýunda hasaby birinji ýaryma goşulan wagtda “Orlando Sitiniň” ýarym goragçysy Marko Paşaliç açdy. 75-nji minutda onuň klubdaşy Dawid Brekalo ikinji sary duýduryşyny alyp, meýdançadan çykdy. Bir minutdan Lionel Messi penaltiden gol geçirdi, 88-nji minutda bolsa Žordi Albanyň topy geçirmeginde ikinji goluny girizdi. Ikinji ýaryma goşulan wagtda Telasko Segowiýa gutarnykly hasaby kesgitledi, oňa Luis Suares kömek etdi.
Karsondaky “Digniti Hels Sports Park” meýdançasynda geçirilen beýleki bir ýarym final oýnunda “Los-Anjeles Gelaksi” bilen “Sietl Saunders” duşuşdy. “Sietl” 2:0 hasabynda ýeňiş gazandy.
Ýeňijileriň düzüminde Pedro de la Wega (7-nji minut) we Osaz De Rozario (57) tapawutlandy. 83-nji minutda “Sietliň” goragçysy Nuu Tolo gyzyl duýduryş aldy, ýöne bu oýnuň netijesine täsir etmedi.
Belläp geçsek, “Inter Maýami” 2023-nji ýylda Messi üçin ilkinji möwsümde Ligalaryň kubogyny utdy. Bu klubuň taryhynda ilkinji resmi kubok boldy.
