Hennessey amerikan kompaniýasy Montereý şäherindäki Awtoulag hepdeliginde taryhyndaky iň gymmat hem iň özboluşly awtoulagyny — Venom F5 Revolution LF giperkaryny tanyşdyrdy.
Bu ulag, aýratyn sargytlar boýunça işleýän Maverick bölüminiň ilkinji taslamasy boldy. Awtoulag müşderiniň hormatyna — telekeçi we kolleksioner Luis Floriýanyň ady bilen atlandyryldy.
Inženerler 6,6 litrlik, goşa turbokompressorly V8 hereketlendirijini täzeden işläp düzdüler. Onuň güýji 1817-den 2031 at güýjüne çenli ýokarlandyryldy. Tork güýji alty basgançakly mehaniki transmissiýa arkaly yzky tekerlere geçirilýär. Hennessey kompaniýasy bu wersiýadaky Venom F5-i dünýäde iň kuwwatly benzinde işleýän awtoulag hökmünde yglan etdi. Öň satylan 32 sany Venom F5-iň eýeleri hem öz ulaglaryny şu konfigurasiýa çenli täzeläp bilerler.
Giperkara täze aerodinamik beden kit, uly yzky ganat, täzelenen asma ulgamy we karbon monokok berildi. Salon doly üýtgedildi: alýumin H-şekilli geçiriş gurluşly merkezi konsol, lazer bilen nagyşlanan täze pedal toplumy, şeýle-de sagat dizaýnyndan ylham alan düwmeler we tumblerler ýerleşdirildi. Hatda sürüjiniň oturmagyny ýeňilleşdirmek üçin poluň gurluşy hem üýtgedildi.
