ABŞ-nyň umumy döwlet bergisi 37 trln dollardan geçdi. Bu barada ABŞ-nyň Maliýe ministrliginiň ýurduň gündelik maliýe amallary baradaky hasabatda görkezilen maglumatlaryna salgylanyp, Associated Press habar berýär.
Şeýle görkeziji berginiň artmagynyň çaltlaşýandygyny we salgyt töleýjiler üçin çykdajylaryň artýandygyny görkezýär diýip, agentlik ýazýar. Kongresiň býujet dolandyryşynyň 2020-nji ýylyň ýanwaryndaky çaklamalaryna görä, bu çäge diňe 2030-njy maliýe ýylyndan soň ýetmelidi. Ýöne 2020-nji ýylda başlanan we uly ykdysady pese gaçyşa sebäp bolan COVID-19 pandemiýasy berginiň artmagyny çaltlaşdyrdy. Federal hökümet ykdysadyýeti durnuklaşdyrmak we dikeltmek üçin işjeň ýagdaýda karz aldy.
2025-nji ýylyň başynda Prezident Donald Tramp çykdajylar we salgytlary azaltmak barada kanuna gol çekdi. Bu bolsa, analitikleriň pikiriçe, geljek on ýylyň dowamynda döwlet karzyny 4,1 trln dollar artdyrar.
ABŞ-nyň Hasap palatasy döwlet karzynyň ösüşiniň karz çykdajylarynyň artmagyna, işewürlik maýa goýumlarynyň azalmagy sebäpli zähmet haklarynyň azalmagyna we harytlaryň hem hyzmatlaryň gymmatlamagyna getirjekdigini görkezýär.
34 trln dollar çäkden 2024-nji ýylyň ýanwarynda, 35 trln dollardan 2024-nji ýylyň iýulynda, 36 trln dollardan şol ýylyň noýabrynda geçildi. Häzir her bäş aýdan karz 1 trln dollar ýokarlanýar – bu soňky 25 ýyldaky ortaça depginden iki esse çaltdyr. Kongresiň Birleşen ykdysady komitetiniň hasaby boýunça, häzirki depginde indiki trilliona, takmynan, 173 günde ýetiler.
