Samsung ABŞ-da çip öndürmeklige ozal meýilleşdirilen 37 milliard dollara derek, takmynan, 50 milliard dollar maýa goýmagy meýilleşdirýär. Bu barada Günorta Koreýanyň SEDaily neşiri habar berýär. Neşiriň habar bermegine görä, kompaniýa ýarymgeçiriji önümlerini import etmekde 100 göterimli amerikan paçlaryndan boşadylmagyna garaşýar.
Ozal, Samsung-yň ýolbaşçylary ikirjiňlenýärdi: ilkibaşda Tehasyň Teýlor şäherindäki topluma, şol sanda çip synagy we gaplaýyş desgasyna 44 milliard dollar maýa goýmak meýilleşdirilipdi. Emma bu hyzmatlar üçin müşderileriň ýoklugy sebäpli taslama 37 milliard dollara çenli azaldyldy.
ABŞ-da içerki çip synagy we gaplamak boýunça öz kuwwatynyň bolmagyna zerurlygy artdyrýan Tesla bilen baglaşylan şertnamadan soň ýagdaý üýtgedi. Goşmaça maýa goýumlary Tehasdaky toparyň ösmegine we ýokarlandyrylan gümrük tölegleriniň girizilmek töwekgelçiligini azaltmaga mümkinçilik berer.
Teýlordaky esasy desganyň gurluşygy möhletinden öň tamamlanyp barýar: birinji çärýegiň ahyrynda binanyň takmynan 92%-i tamamlandy we ony oktýabr aýynyň ahyryna çenli doly tamamlamagy meýilleşdirýärler. “Arassa otaglar” ýylyň ahyryna çenli enjamlary gurnamaga taýyn bolar we enjamlary gurnamaklyga bolsa indiki ýyl girişiler.
Günorta Koreýanyň habar beriş serişdeleri taslamanyň doly durmuşa geçirilmegi Samsung-y ABŞ-da ikinji uly şertnamalaýyn çip öndürijisine öwrer diýip bellediler. Ondan öň, ýylyň başynda Taýwanyň TSMC kompaniýasy häkimiýet başyna gelen Donald Trampyň basgysy bilen özüniň Amerika maýa goýumlarynyň mukdaryny 65 milliard dollardan 165 milliard dollara çenli ýokarlandyrmagy, üçüsine derek sekiz kärhana gurmagy wada berdi.
