Kanadada Hyundai Tiburon kupesiniň we Honda Goldwing motosikliniň böleklerinden elde ýygnalan üç tekerli ulag (trisikl) satuwa çykaryldy. Adaty bolmadyk bu ulagyň bahasy 4,5 müň dollar diýip, Carscoops habar berýär.
Suratlardan görnüşine görä, trisikliň öňki bölegi Hyundai Tiburon (Hyundai Coupe) ulagyndan alnypdyr. Ulagyň hereketlendirijisi, korpus gurluşy we asma ulgamy saklanypdyr. Rul merkezine geçirilip, elde ýasalan panel bilen enjamlaşdyrylypdyr. Öňündäki aýnasy ýok.
Ulagyň yzky bölegine Honda Goldwing motosikliniň oturgyjy we yzky podweska ulgamy goşulypdyr. Oturylyşy motosikliňkä meňzeýär, emma dolandyryşy awtoulagdaky ýaly: ruly, pedaly we awtomat geçiriş gutusynyň selektory bar.
Satyjynyň aýtmagyna görä, hereketlendiriji Tiburon-yň adaty 2 litrlik, 140 at güýjüne çenli kuwwaty bolan motorydyr. Tehniki taýdan başga üýtgeşme barada maglumat berilmeýär.
Traýk resmi taýdan kwadrotsikl hökmünde hasaba alyndy, ýöne ony jemgyýetçilik ýollarynda sürmäge rugsat berilmeýär.
