Halkara Euronews täzelikler saýty Türkmenistanyň küşt sporty boýunça gazanan üstünlikleri barada gürrüň berdi. Habarda ýurdumyzyň bu sport babatda halkara giňişliginde orunlaryny berkitmek ugrundaky möhüm tagallalary bellenilip geçilýär.
Habarda Türkmenistanyň sebitleýin ýaryşlary geçirmekden halkara ykrar edilmeginiň ýoluny ynamly geçip, küşt sportunyň düzgünleşdirilen ulgamyny emele getirýändigi bellenildi. 2024-nji ýylyň özünde ýurdumyzda FIDE reýtingli ýaryşlaryň 130-sy geçirildi, 2025-nji ýylda bolsa ähli welaýatlary öz içine alýan milli ýaryşlaryň tapgyrynyň geçirilmegi dowam edýär.
Euronews ýurdumyzyň ýaş küştçülerini goldamak babatdaky tagallalaryna aýratyn üns berýär. Olaryň arasynda alty ýaşdan başlap, çagalaryň dowamly küşt sapaklaryna we ýaryşlaryna, şeýle hem halkara ýaryşlara gatnaşmaklary barada bellenilýär. Ýaş türkmen küştçüleri öz reýtinglerini işjeň ösdürýär, ýurdumyzda bolsa halkara ussatlaryň gatnaşmagynda türgenleşik çäreleri we onlaýn-seminarlary geçirilýär.
Materialda Türkmenistanyň tanymal küştçüleri grossmeýsterler Saparmyrat Atabaýewiň, Mesgen Amanowyň, Ýusup Atabaýewiň, şeýle hem 2025-nji ýylda aýallaryň arasynda Dünýä kubogyna gatnaşan ilkinji türkmen gatnaşyjysy FIDE ussady Lala Şöhradowanyň atlary agzalyp geçilýär.
Euronews neşiriniň pikirine görä, şeýle üstünlikler Türkmenistanyň küşt federasiýasynyň goldawy bilen amala aşyrylýan maksadalaýyk we hemmetaraplaýyn çemeleşmä şaýatlyk edýär.