Genesis kompaniýasy sekiz silindrli täze hereketlendirijiniň şekillerini görkezdi. Ol Oreca kompaniýasy tarapyndan çydamlylyk ýaryşy üçin işlenip düzülen GMR-001 bolidi üçin niýetlenendir diýip, CarBuzz neşiri habar berýär.
Hereketlendirijiniň eýýäm synagdan geçirilendigi we şasside oturdylandygy aýdylýar. Bu soňky ýyllarda Genesis-iň öz ilkinji V8-dir. Çeşmäniň habar bermegine görä, geljekde hereketlendiriji Magma sport subbrendiniň çäginde raýat wersiýasyny hem alyp biler.
Hereketlendirijiniň häsiýetnamasy resmi taýdan aýan edilmeýär. Onuň goşa turbo güýçlendirijisi bilen enjamlaşdyrylandygy we öň Hyundai tarapyndan ralli ýaryşlarynda ulanylan iki sany birleşdirilen dört silindrli hereketlendirijiniň gurluşyndan ybaratdygy mälimdir. GMR-001 elektrik gurluşynyň bir bölegi hökmünde bu hereketlendiriji elektrik moduly bilen işlär. Jemi kuwwaty 680 at güýji bilen çäklenýär.
Şasside oturdylmazdan ozal agregatyň synag stendlerinde dürli režimlerde birnäçe aýlap synaglardan geçirilendigi habar berildi. GMR-001-iň ýola ilkinji çykyşy awgust aýynda meýilleşdirilýär we ýaryş ýollarynda bolsa bolid indiki ýyl peýda bolar.
Kompaniýa şeýle elektrik gurluşly öz superkaryny döretmek mümkinçiligine seredýär. Bu barada geçen ýylyň ahyrynda Genesis-iň döredijilik müdiri Lýuk Donkerwolke aýdypdy. Başlangyç tapgyrda Magma subbrendi bar bolan modelleriň sport görnüşlerine ünsi jemlär. Bir çaklama görä, V8 G80 sedanynda oturdylyp bilner.
