Donald Tramp ABŞ-nyň BMG-niň Bilim, ylym we medeniýet meseleleri boýunça guramasy ÝUNESKO-dan çykmagy barada çözgüt kabul etdi. Bu barada 22-nji iýulda ABŞ-nyň Döwlet departamenti habar berdi.
Häkimiýetler öz çözgüdi barada guramanyň baş direktory Odre Azuleni habardar etdi, ýurt 2025-nji ýylyň 31-nji dekabryndan onuň doly hukukly agzasy bolmagyny bes eder.
New York Post-yň Ak tamyň metbugat sekretarynyň orunbasary Anna Kellä salgylanyp habar berşi ýaly, bu çözgüt Ak tamyň ýolbaşçysynyň pikiriçe, ÝUNESKO-nyň “sagdyn pikire we amerikalylaryň noýabrda ses beren syýasatyna doly ters gelýän gapma-garşy, agzalalyk dörediji medeni we sosial taslamalary” goldaýandygy sebäpli Prezident tarapyndan kabul edildi.
Azule ABŞ-nyň guramadan çykmagyna gynanç bildirdi, ýöne munuň garaşylan çözgütdigini belledi.
“Bu çözgüt köptaraplaýynlygyň esasy ýörelgelerine ters gelýär we ilkinji nobatda, biziň ABŞ-daky köp hyzmatdaşlarymyza täsir edip biler” – diýip, guramanyň metbugat gullugy belledi.
ABŞ eýýäm iki gezek ÝUNESKO-dan çykdy. 1984-nji ýylda Ronald Reýganyň administrasiýasy “aşa syýasylaşdyrma” we býujetiň “oýlanyşyksyz” harçlanmagy sebäpli çykmak barada çözgüt kabul etdi. Ikinji gezek ABŞ Trampyň birinji prezidentlik möhletinde 2018-nji ýylyň 31-nji dekabrynda Ysraýyl bilen bilelikde ÝUNESKO-dan çykdy. Jo Baýden 2021-nji ýylda Prezident wezipesine girişenden soň Trampyň çözgüdini ýatyrdy.
Birleşen ştatlaryň çäginde ÝUNESKO-nyň Bütindünýä mirasynyň 26 obýekti ýerleşýär. Olaryň arasynda Nýu-Ýorkdaky Azatlyk heýkeli, Uly kanýon, Ýellouston we Ýosemit milli seýilgähleri bar. Ýurduň guramadan çykmagy olaryň statusyna täsir etmez. 1972-nji ýylyň konwensiýasyna laýyklykda, şeýle desgalary gorap saklamak we maliýeleşdirmek jogapkärçiligi olaryň ýerleşýän döwletlerine degişlidir.
