Amerikaly Dastin Porýe Täze Orleanda geçirilen UFC 318 ýaryşynyň esasy söweşinde watandaşy Maks Holloueýden ýeňildi.
Ýeňil agramda geçen söweş tutuş bäş raund dowam etdi. Eminleriň biragyzdan karar bermegi bilen Holloueý ýeňiş gazandy. Söweş BMF guşagy ugrunda geçirildi we Maks tituly üstünlikli gorady.
Mundan öň Porýe bu söweşiň karýerasynda iň soňky boljakdygyny aýdypdy. Şonuň üçin ol söweşden soň elligini çykaryp, ony oktagonyň merkezinde goýdy. Bu hereket söweşijiniň garyşyk başa-baş söweşlerde karýerasyny resmi taýdan tamamlaýandygyny aňladýar.
Belläp geçsek, Porýe Holloueýden iki gezek üstün çykdy. 2012-nji ýylyň fewralynda geçirilen söweşde ol birinji raundda ýeňiş gazandy, 2019-njy ýylyň aprelinde bolsa emin agzalarynyň biragyzdan karar bermegi bilen ýeňdi.
36 ýaşly Porýeniň hasabynda indi 30 ýeňiş we 10 ýeňliş bar, ýene bir söweş geçirilmedik diýlip hasaplandy. 33 ýaşly Holloueýiň hasabynda bolsa 27 ýeňiş we 8 ýeňliş bar.
