Kamerunyň 92 ýaşly Prezidenti Pol Biýýa 2025-nji ýylyň 12-nji oktýabrynda geçiriljek saýlawlar üçin öz dalaşgärligini hödürleýändigini yglan etdi.
“Meniň size hyzmat etmek hyjuwymyň öňümizde duran kynçylyklara laýyk gelýändigine doly ynanyp bilersiňiz. Bilelikde biz islendik päsgelçilikleri ýeňip geçeris” – diýip, ol sosial ulgamlarda ýazdy.
Biýýa Prezident wezipesini 1982-nji ýyldan bäri eýeleýär we dünýäde iň garry döwlet Baştutany hasaplanýar. Onuň gaýtadan saýlanyp bilmegi tas 100 ýaşyna çenli häkimiýet başynda galmaga mümkinçilik berer diýip, Reuters belleýär. 2008-nji ýylda ol prezidentlik möhletiniň sanyna degişli çäklendirmeleri ýatyrdy, bu hem oňa birnäçe gezek dalaşgär bolmaga mümkinçilik berdi. 2018-nji ýyldaky saýlawlarda onuň 71,28% ses alandygy yglan edildi.
CPDM dolandyryjy partiýasynyň agzalary 2024-nji ýyldan bäri Biýýany saýlawlara ýene gatnaşmaga çagyrdy. Ýöne onuň öňki iki ýarany dolandyryjy koalisiýany terk etdi we garaşsyz dalaşgär hökmünde öz kandidaturalaryny hödürlemek isleýär.
Pol Biýýa köpçüligiň öňünde seýrek peýda bolýar we öz wezipe borçlaryny, köplenç, Prezidentiň administrasiýasynyň başlygyna ynanýar.
Biýýadan öňki, Kamerunyň ilkinji Prezidenti Ahmadu Babatura Ahijo bu wezipäni 1960-njy ýyldan 1982-nji ýyl aralygynda eýeledi we saglyk ýagdaýy sebäpli wezipeden çekildi.
