Madridiň Ýokary kazyýeti Madridiň “Realynyň” öňki baş tälimçisi Karlo Ançelottini salgyt tölemändigi bilen bagly iş boýunça bir ýyl tussaglyga höküm etdi. Bu barada kazyýet çözgüdiniň tekstine salgylanyp, TASS habar berýär.
Derňewiň maglumatlaryna görä, Ançelotti 2014-nji we 2015-nji ýyllarda diňe futbol klubundaky işinden alýan girdejisini mälim edip, goşmaça girdeji çeşmelerini görkezmedi. Salgyt töleginiň umumy mukdary 1,062 mln ýewro boldy.
Bellemeli ýeri, zorluksyz jenaýatlar üçin we Ispaniýanyň kanunlaryna laýyklykda kazyýet jogapkärçiligine çekilmedik ýagdaýynda iki ýyla çenli azatlykdan mahrum etmek hökümi, adatça, şertli hasaplanýar. Italýan tälimçisi salgyt edaralaryna 386 362 ýewro möçberde jerime tölemeli bolar.
Karlo Ançelotti “Reala” iki gezek ýolbaşçylyk etdi: birinji gezek – 2013-nji ýylyň iýunyndan 2015-nji ýylyň maýyna çenli, ikinji gezek – 2021-nji ýylyň iýunyndan 2025-nji ýylyň maýyna çenli. Şondan soň ol patyşalyk kluby bilen hyzmatdaşlygy tamamlap, Braziliýanyň milli ýygyndysynyň baş tälimçisi boldy.
