Mälim bolan Mars meteoritlerinden iň ulusy – NWA 16788 2025-nji ýylyň 16-njy iýulynda Sotheby’s auksionyna çykarylar. Onuň çen-takmyn bahasy 4 mln dollara barabar diýip, CNN habar berýär.
Auksion öýüniň maglumatlaryna görä, meteoritiň agramy 25,4 kg bolup, bu ony Ýerde tapylan, takmynan, 400 Mars böleginiň arasynda iň ulusy edýär. Deňeşdirmek üçin, ululygy boýunça indiki meteoritiň agramy 70% az.
“NWA 16788 – bu adatdan daşary möhüm açyş we häzire çenli Ýerde tapylan iň uly Mars meteoriti. Kosmosdaky syýahaty bilen birneme dargasa-da, onuň ululygy we özboluşly gyzyl reňki ony nesilde bir gezek duşýan tapynda öwürýär” – diýip, Sotheby’s auksionynyň ylym we tebigy taryh boýunça wise-başlygy Kassandra Hetton belledi.
Seljerme meteoritiň uly asteroidiň urgusy netijesinde Marsyň üstünden zyňlandygyny görkezdi. Ýokary temperatura sebäpli onuň üstüniň bir bölegi eräp, aýna öwrülipdir.
Şeýle gymmatly obýektiň ylmy edara berilmän, satuwa çykarylmagy käbir hünärmenlerde alada döredýär. Ýöne Lester uniwersitetiniň Kosmos we astronomiýa institutynyň ylmy işgäri Juliýa Kartraýtyň belleýşi ýaly, bu ylalaşygyň bir bölegi: “Eger şeýle meteoritler tapylmadyk bolsa, bizde öwrenmek üçin şonça material bolmazdy we häzir bilýän zatlarymyzy bilmezdik. Üstesine-de, NWA 16788-e bolan ylmy gyzyklanma saklanýar, onuň eýesi hem ony öwrenmäge gyzyklanma bildirip biler – şonuň üçin biz ýene ylmy maglumatlary alarys”.
