Awgust aýynda 001 şassi belgili Bugatti Bolide giperkarynyň birinji nusgasy Gooding & Company tarapyndan auksiona çykarylar. Hünärmenleriň baha bermegine görä, onuň bahasy 6 million dollara ýetip biler. Bu awtoulag diňe ýaryş ýollarynda ulanmak üçin niýetlenendir.
Ulag ilkinji gezek iki ýyl mundan ozal Gudwuddaky Tizlik festiwalynda çykyş edipdi. Müşderilere eltip bermeklik ýaňy başlandy, indi bolsa hiç hili sürülmedik birinji nusga eýesine garaşýar. Başlangyç bahasy 4 million ýewro bolsa-da, auksion bahasy ep-esli ýokary bolup biler. Bary-ýogy 40 nusga çykarylar we olar hem eýýäm satyldy.
Bugatti Bolide ulagy Chiron-nyň binýadynda döredildi, ýöne ýaryşlar üçin uýgunlaşdyryldy. Onda karbon monokoky, aňrybaş basyp sürmek üçin aerodinamiki korpus, şeýle hem üýtgedilen podweska, hereketlendiriji, geçiriş gutusy we ähli tekerleri hereketli ulgam bilen enjamlaşdyryldy. Howpsuzlygy FIA-nyň ülňülerine laýyk gelýär.
Dört turbo güýçlendirijili 8 litrlik W16 hereketlendirijisi 7050 aýlawda 1600 at güýjüni öndürýär. Ol 2,2 sekuntda 100 km / sag tizlige çykýar we aňrybaş tizligi sagatda 380 km-e ýetýär. Iň ýokary tizlikde korpus toplumy awtoulagyň öz agramyndanam iki esse artyk basyş güýjüni döredýär.
