Agyr agramda UFC-niň çempiony Jon Jons 37 ýaşynda karýerasyny tamamlady. Bu barada söweş guramasynyň prezidenti Dana Uaýt Azerbaýjanda metbugat maslahatynda aýtdy. Bu ýerde UFC Fight Night ýaryşy geçirildi.
“Jon Jons düýn agşam jaň edip, karýerasyny tamamlaýandygyny aýtdy. Jon Jons resmi taýdan karýerasyny tamamlady. Tom Aspinall – agyr agramda UFC-niň täze çempiony” – diýip, Uaýt aýtdy.
Soňrak Jons hem bu maglumaty sosial ulgamlarda tassyklady. “Bu çözgüt uzak pikirlenmeden soň kabul edildi we men häzire çenli geçen ýolum üçin çuňňur minnetdarlyk bildirmek pursatyndan peýdalanmak isleýärin” – diýip, söweşiji ýazdy.
Jons iýul aýynda 38 ýaşyny doldurar. Ol karýerasynda 28 ýeňiş (11-isi – nokaut bilen) gazandy we bir ýeňlişe sezewar boldy. Ol UFC-niň taryhynda iň ýaş çempion (21 ýaş) boldy. 2008-nji ýyldan bäri promouşende çykyş etmek bilen, amerikaly ýarym agyr agramda 11 gezek guşagyny gorady, agyr agrama geçenden soň iki söweş geçirip, olary möhletinden ir tamamlady: 2023-nji ýylda Siril Gany ýeňip, erkin titula eýe boldy, 2024-nji ýylyň noýabrynda bolsa Stipe Mioçiçe garşy söweşde tituly gorady.
UFC-de Jons bilen wagtlaýyn çempion Tom Aspinallyň arasynda söweşe garaşylypdy, ýöne Jons şikes alyp, söweşe çykyp bilmedi. ESPN Jonsy Aspinall bilen söweşden ýüz öwrendigi üçin tituldan mahrum etmegi talap edýän onlaýn-haýyşnamanyň 200 müň töweregi gol ýygnandygyny belleýär.
Jons MMA taryhynda iň beýik söweşijileriň biri hasaplanýar we çempionlyk söweşlerinde gazanan ýeňişleriniň sany boýunça UFC-niň rekord eýesi bolup galýar – 16. Ol birnäçe agram kategoriýasynda UFC-niň titullaryny gazanan dokuz söweşijiniň biridir.
