Türkmenistanly karateçiler Bişkek şäherinde geçirilýän Merkezi Aziýanyň WKF karate boýunça 10-njy çempionatynda jemi 12 medal gazandylar. Bu barada Türkmenistanyň karate-do federasiýasy habar berdi.
Ýaryşa Gazagystan, Gyrgyzystan, Täjigistan, Türkmenistan we Özbegistandan gelen 609 türgen gatnaşýar. Medallar kadetleriň, ýetginjekleriň we ulularyň arasynda kýun (görkezme hereketleri) hem-de kumite (tutluşyk) boýunça baýrak ugrunda bäsleşilýär.
Ýaryşyň ilkinji güni türkmenistanly türgenler 7 medal eýelediler: 2 altyn, 2 kümüş we 3 bürünç. Kýun görnüşinde altyn medallara Abdyresul Klyçew (12 ýaşa çenli oglanlar, 11-nji orta mekdep, Baýramaly, tälimçi S. Muhammetnazarow) we Allanur Ýalkabow (17 ýaşa çenli ýetginjekler, 52-nji orta mekdep, Aşgabat, tälimçi B. Ýalkabow) mynasyp boldular.
Kümüş medallary Öwezmyrat Sapadurdyýew (14 ýaşa çenli, Göktepe şäherindäki mekdep, tälimçi S. Setdarow) hem-de Dawut Saryýew (17 ýaşa çenli, 55-nji orta mekdep, Aşgabat, tälimçi B. Ýalkabow) gazandy. Dawut Saryýew ulular kategoriýasynda hem bürünç medal eýeläp, ikinji medala mynasyp boldy. Şeýle hem bürünç medallary Muhammetresul Haýrullaýew (14 ýaşa çenli, 18-nji orta mekdep, Baýramaly) we Rasul Atajanow (ulular, Türkmenistanyň DIM-niň Halkara gatnaşyklary institutynyň talyby) aldy.
Ýaryşyň ikinji güni türkmen türgenleri ýene 5 medala — 1 altyn, 1 kümüş we 3 bürünç medala eýe boldular. Kumite görnüşinde kadetler arasynda (52 kg çenli agramda) Baýramaly şäherindäki Ýaş olimpiýaçylary taýýarlamak mekdebiniň türgeni Bogdan Kiselew (tälimçi A. Çaryýew) altyn medal gazandy.
Kümüş medaly Türkmenistanyň Prezidentiniň howpsuzlyk gullugynyň esgeri Resul Garataýew (21 ýaşa çenli, 55 kg çenli agramda, tälimçi N. Satlykgulyýew) eýeledi.
Kadetleriň arasynda kumitede bürünç medallary Nurgeldi Şamedow (Aşgabat, 38-nji orta mekdep, 52 kg çenli, tälimçi A. Çaryýew), Alymuhammet Kakalyýew (Aşgabat, ýöriteleşdirilen 61-nji orta mekdep, 57 kg çenli, tälimçi A. Çaryýew) we Garamämmet Garamämmedow (Türkmenistanyň döwlet binagärlik-gurluşyk instituty, 60 kg çenli, tälimçi N. Satlykgulyýew) gazandylar.
