Şwesiýanyň Koenigsegg kompaniýasy Dark Matter ady bilen täze elektrik hereketlendirijisini hödürledi. Ol dört orunly Gemera gibrid giperkarynyň öňdäki okuna oturtmak üçin niýetlenýär. Hereketlendirijiniň kuwwaty 800 at güýjüne, aýlama güýji 1250 Nm barabar.
Hereketlendiriji, esasan, ok ýörelgesi boýunça işleýär, ýöne onda radial akym elementleri hem ulanylýar. Bu hem güýjüň birsydyrgyn berilmegini üpjün edýär we ýokary aýlawlarda ýylylyk ýitgisini azaldýar. Esasy aýratynlyklaryň biri onuň konstruksiýasy boldy: rotor we stator doly derejede uglerod plastiginden ýasaldy. Şonuň netijesinde hereketlendirijiniň agramy bary-ýogy 39 kg boldy.
Dark Matter adaty üç elektrik fazasyna derek alty faza ulanýar. Kompaniýanyň maglumatlaryna görä, bu iş durnuklylygyny we netijeliligi ýokarlandyrýar.
Elektrik hereketlendirijisi umumy kuwwaty 2300 at güýjüne ýetjek Koenigsegg Gemera giperkarynyň güýç enjamynyň bir bölegi bolar. Işläp düzüjilerň aýtmagyna görä, täze tehnologiýa geljekde sport awtomobilleri üçin standart bolup biler.
