Stellantis kompaniýasy täze üç basgançakly geçiriş karobkasy üçin patent aldy. Täze karobka konserne degişli geljekki elektromobilleriň ýolsuz ýerlerde hem netijeli hereket etmegine mümkinçilik berer. Täze transmissiýanyň Jeep ýa-da RAM ýaly brendleriň doly (ähli tigirlerden) herekete getirijili elektrikli modellerinde ulanylmagy mümkin diýip, «Motor1» habar berýär.
Patentiň düşündirişinde aýdylmagyna görä, elektromobiller üçin niýetlenen üç basgançakly geçiriş karobkasy pes we ýokary güýç diapazonlaryna eýe geçiriş toplumlaryny öz içine alýar. Bu bolsa dürli şertlerde, şol sanda ýolsuz ýerlerde, asfaltda we hatda çölde hem amatly sürüşi üpjün eder.
Häzirki wagtda köp sanly elektromobiller diňe bir basgançakly geçiriş karobkasyny ulanýarlar. Stellantis-iň bellemegine görä, olar köplenç ýolsuz ýerlerde ýa-da çöllük şertlerde dowamly ýokary torky üpjün edip bilmeýär.
Täze transmissiýa diýseň köp zady wada berýär, sebäbi ol elektromobilleriň gar bolsun, palçyk ýa-da gum bolsun dürli ýol şertlerinde has täsirli işlemekligine mümkinçilik döredip biler. Stellantis bu geçiriş gutusynyň diňe öňdäki ýa-da diňe yzdaky tigirleri, şol sanda doly herekete getirijili tertipde öňdäki we yzdaky tigirleri bir wagtda herekete getirip biljekdigini belleýär.
