Milli basketbol assosiasiýasynyň (NBA) “Los-Anjeles Leýkers” klubuna eýeçilik edýän Bass maşgalasy topary 10 mlrd dollara satar. Bu barada çeşmä salgylanyp, ESPN habar berýär.
Klubuň paýnamalarynyň gözegçilik bukjasy 2021-nji ýyldan bäri toparyň paýnamalarynyň az bölegine eýeçilik edýän TWG Global kompaniýasynyň baş direktory Mark Uoltere geçer. Uolter “Los-Anjeles Dojers” beýsbol klubuna we NBA-nyň “Los-Anjeles Sparks” zenanlar toparyna hem eýeçilik edýär.
Şertnama sport taryhynda iň ulusy bolar. Deňeşdirmek üçin, 2023-nji ýylda amerikan futboly boýunça “Waşington Kommanders” topary 6,05 mlrd dollara satyn alyndy, 2025-nji ýylyň mart aýynda bolsa NBA-nyň iň köp titully “Boston Seltiks” klubunyň 6,1 mlrd dollara satylandygy belli boldy.
Çeşmäniň maglumatlaryna görä, Bass maşgalasy az wagtlyk “Leýkersde” paý saklap galar – ol 15%-den sähel köp bolar. Jinni Bass klubuň müdirler geňeşiniň başlygy wezipesini ýerine ýetirmegini dowam etdirer.
Bass maşgalasy “Los-Anjeles Leýkerse” 1979-njy ýyldan bäri eýeçilik etdi. Bu döwürde topar 11 gezek NBA-nyň çempiony boldy – bu şeýle döwürde liganyň islendik beýleki klubundan köpdür.
