Hytaýyň Geely awtoulag öndürijisi «Galaxy E5» elektromobili üçin niýetlenen «Aegis Gold Brick» akkumulýatoryny adatdan daşary synagdan geçirdi. Akkumulýatoryň üstünden 36 tonnalyk «ZTZ-59D» tankynyň birnäçe gezek geçendigine garamazdan, oňa hiç hili zeper ýetmedi diýip, «Interesting Engineering» habar berýär.
Akkumulýator döwülmedi, ot almady, partlamady, şeýle-de hiç hili syzma hem ýüze çykmady.
Akkumulýator çeýe materiallardan ýasalan we alýumin oksidiniň ýylylyga çydamly gatlagy bilen örtülen. Onuň gurluşy zarbalary siňdirmäge ukyply dört bölekden ybarat. Şeýle hem aşagyndaky 2,6 millimetrlik «sendwiç» gurluşly plastina güýçli goragy üpjün edýär.
Tank batareýanyň aýratyn modullarynyň hem-de 10 öýjükden ybarat toparlarynyň üstünden geçdi. Basyş hytaýyň howpsuzlyk standartlaryndan 80% ýokary boldy. Muňa garamazdan, batareýa döwülmedi, gyzyp gitmedi, şekili hem üýtgemedi.
Söweşjeň tehnika bilen şeýle synaglaryň geçirilmegi awtoulag senagatynda seýrek ýagdaýdyr. Köplenç akkumulýatorlar kraş-testler, deşilme ýa-da hyzmat möhletini ölçemek synaglary bilen barlanýar.
Bu görkezme Hytaýda elektromobilleriň howpsuzlygyna bolan talaplaryň güýçlendirilýän döwründe geçirildi. Mart aýynda ýurduň Senagat we maglumat tehnologiýalary ministrligi akkumýatorlar üçin täze, has berk düzgünleri girizdi. Bu talaplar 2026-njy ýylyň iýul aýynda güýje girer.
