“Pari Sen-Žermeniň” hüjümçisi Usman Dembele 2024/2025 möwsüminiň Çempionlar ligasynyň iň gowy oýunçysy diýlip ykrar edildi. Bu barada Ýewropanyň Futbol Assosiasiýalarynyň Birleşiginiň (UEFA) resmi saýtynda habar berilýär.
28 ýaşly fransuz bu ýaryşda 15 oýna gatnaşyp, 8 gol geçirdi we 6 assist etdi. Finalda ol iki assist bilen tapawutlandy.
Ýaryşyň iň gowy ýaş oýunçysy onuň 19 ýaşly topardaşy, winger Dezire Due boldy. Geçen möwsümde ol 16 oýna gatnaşyp, 5 gol geçirdi we 5 assist etdi.
UEFA-nyň saýtynda ony “möwsümiň açyşy”, “Inter” bilen final oýnunyň iň gowy oýunçysy diýip atlandyrdylar.
“Ol finalda iki gol geçiren ilkinji ýetginjek boldy. Geljekde beýleki ýaş oýunçylary özüni görkezmäge ruhlandyryp biljek nusgalyk göreldäniň bolmagy örän gowy” – diýlip, habarda aýdylýar.
Şeýle-de, UEFA ýaryşyň simwolik toparyny hödürledi. Oňa “PSŽ-niň” ýedi, “Barselonanyň” iki, “Interiň” we “Arsenalynyň” bir oýunçysy girdi.
- Çempionlar ligasy 2024/2025-iň simwolik toparynyň düzümi:
- Derwezeban: Janluiji Donnarumma (“PSŽ”).
- Goragçylar: Aşraf Hakimi (“PSŽ”), Markinýos (“PSŽ”), Alessandro Bastoni (“Inter”), Nunu Mendeş (“PSŽ”).
- Ýarymgoragçylar: Witinýa (“PSŽ”), Deklan Raýs (“Arsenal”).
- Hüjümçiler: Lamin Ýamal (“Barselona”), Dezire Due (“PSŽ”), Usman Dembele (“PSŽ”), Rafinýa (“Barselona”).
Ýatlap geçsek, ýaryşyň finalynda “PSŽ” “Interi” 5:0 hasabynda utdy. Bu Çempionlar ligasynyň taryhynda Pariž klubunyň ilkinji ýeňşi boldy.
