Aston Martin diňe bir nusgada döredilen, aýratyn «DB12 Volante Palm Beach Edition» atly kabrioletini hödürledi. Bu awtoulag ABŞ-nyň iň baý şäherleriniň biri bolan Palm-Biç üçin ýörite taýýarlandy.
Bu model «Aston Martin Palm Beach» diler merkeziniň sargydy boýunça «Q» bölümi tarapyndan işlenip düzüldi. Ol Floridanyň baýlyk we nepislik bilen baglanyşdyrylýan keşbini şöhlelendirýär.
Awtoulagyň kuzowy açyk gök (mawy) reňkiň «Frosted Glass Blue» öwüşginine boýalan we ak elementler bilen bezelen. Gara ýalpyldawuk tekerler keşbiniň üstüni ýetirýär.
Interýeri deňiz äheňinde bezelen: oturgyçlar we paneller «Aurora Blue» we «Ivory White» reňk deri bilen örtülen. Gyzyl ýüplükden tikinler we zeýtun agajyndan ýasalan agaç detallar dizaýny has-da baýlaşdyrýar. Oturgyçlar, tirseklikler we gapy panelleri ýüzünde palma ýapragynyň şekili bilen ýörite logotip bilen bezelen.
«Awtoulag Palm-Biçiň nepisligini we brendimiziň ussatlygyny özüne jemleýär. Ol diňe bir dizaýn ajaýyplygy däl, eýsem, güýçli häsiýetli sport awtoulagydyr» — diýip, «Aston Martin The Americas» sebit bölüminiň prezidenti Pedro Mota aýtdy.
ABŞ-da «DB12 Volante» modeliniň başlangyç bahasy 265 müň dollardan başlaýar. Elbetde, «Palm Beach Edition-yň» bahasy has ýokary bolar, sebäbi bu model – ýeke-täk.
