Land Rover 2026-njy ýyl üçin täzelenen Defender modelini tanyşdyrdy. Bu barada «Carscoops» habar berýär.
Täze model täze görnüşli LED çyralar we garaldylan yzky yşyklar bilen enjamlaşdyrylan. Täze reňk görnüşleriniň goşulmagy bilen, ulagyň daşky görnüşi has-da özüne çekiji boldy: «Woolstone», «Borasco» we «Sargasso» ýaly täze öwüşginler goşuldy. Iň ýokary görnüş bolan «Defender Octa» üçin bürünç bezegli görnüş hem hödürlenýär.
Salonynda täze 13,1 dýuýmlyk (ozal 11,4 dýuýmdy) multimediýa ekrany oturdylan. Merkezi konsol täzeden işlenip düzülen, dakyp-çykarylýan gapdalky karmanlar goşulan we sürüjiniň ünsüni gözegçilikde saklaýan ulgam kämilleşdirilen.
Hereketlendiriji hatary öňküligine galýar. Alyjylara 3,0 litrlik benzinli we dizel hereketlendirijiler, PHEV gibrid ulgamy we 5,0 litrlik V8 hereketlendiriji hödürlenýär. «Defender Octa» wersiýasy indi BMW-den alnan 4,4 litrlik hereketlendiriji bilen enjamlaşdyrylýar – ol 635 at güýjüni öndürýär we 750 Nm tork berýär.
Beýik Britaniýada täzelenen Defender-iň bahalary 57 müň 135 funt sterlingden (takmynan, 76 müň 900 dollardan) başlaýar.
