Toyota awtomobiller üçin öz Arene operasion ulgamynyň üstünde işleýär. Ony indiki ýylyň mart aýynda kompaniýanyň iň meşhur modelleriniň biri bolan täze nesil RAV4 ulagyna ornaşdyrmak meýilleşdirilýär.
Financial Times-yň habar bermegine görä, Arene-niň işlenip taýýarlanmagy ýedi ýyl bäri dowam edýär. Taslama üçin Woven by Toyota bölümçesi jogap berýär. Bu operasion ulgam sürüjä awtoduralga ýerleşmäge, zolagy saklamaga kömek edip, multimediýa funksiýalaryny dolandyrar.
Toyota hytaý awtoöndürijileriniň bu ugurdaky üstünliklerine syn edip, Arene-niň olar bilen bäsleşip bilmegine umyt bildirýär.
“Tutuş dünýä, şol sanda Woven Hytaýda bolup geçýän zatlary yzarlaýar. Biz bu bazarda bäsdeşlik artykmaçlygyny nädip saklamalydygyny anyklamaly we Arene bu meselede bize kömek eder” – diýip, Woven-iň tehniki müdiri Jon Absmaýer belledi.
FT ýapon awtoöndürijileriniň ygtybarly awtomobilleri öndürmekde güýçlüdigini, ýöne programma üpjünçiligi nukdaýnazaryndan ep-esli yza galýandygyny belleýär. Gartner kompaniýasynyň maglumatlaryna görä, Toyota programma üpjünçiliginden pul gazanmak mümkinçiligi bolan awtoöndürijileriň reýtinginde yzdan üçünji orny eýeledi. Öňdebaryjylar Tesla, Nio we Xpeng boldy.
Ilkibaşda Arene sürüjä kömek bermek we dynç alyş ulgamy ýaly esasy funksiýalary alar. Doly derejeli wersiýa gijräk çykar. Ulag hünärmeni Takaki Nakanişiniň pikiriçe, Arene-niň çäkli funksiýalary onuň häzirlikçe Tesla ýaly bäsdeşlerden yza galýandygyny görkezýär – mysal üçin, Tesla-nyň soňky täzelenmesi faralaryň işini gowulandyrýar we sürüji ulagdan çykyp, ony ýapan bolsa-da, telefona zarýad berip bilýär.
