Ýaponiýada Toyota Crown sedanynyň ýörite wersiýasy satylyp başlandy, ol modeliň 70 ýyllygyna bagyşlanýar. Bu wersiýa Crown Special Edition Z «The 70th» adyny aldy.
Model Mercedes-Maybach awtomobilini ýatladýan kuzowyň iki reňkli boýagy bilen tapawutlanýar: onuň üsti Precious Metal kümüşsöw reňkinde, aşaky bölegi bolsa ak ýa-da gara perlamutrda ýerine ýetirildi. Salonda premium materiallar we tebigy agaçdan ýasalan elementler ulanylýar. Modeliň 70 ýyllygy mynasybetli ýörite nyşan hereket gutusynda, enjam panelinde we brelokda peýda boldy.
Awtomobil 20 dýuýmlyk öçügsi gara diskler, bezeg elementleri we aýryp bolýan oturgyç “kelleleri” bilen üpjün edildi. Şeýle-de, hapadan we tegmilden goragly bolan öçügsi goýy çal reňkli Crown Z Limited Matte Metal wersiýasy hödürlendi.
Wersiýalaryň ikisi-de güýç enjamlarynyň iki görnüşi: 2,5 litrlik hereketlendirijä esaslanýan öz-özüne zarýad berýän gibrid we Toyota Mirai modelinde ulanylýan ýaly wodorod ýangyçly ulgam bilen hödürlenýär.
Crown «The 70th» ulagynyň gibrid wersiýasynyň bahasy 7,55 mln ýenadan (takmynan, 52,7 müň dollar) başlaýar, Matte Metal-yň wodorod wersiýasynyň bahasy bolsa 9,1 mln ýena (takmynan, 63,5 müň dollar) ýetýär.
