“Barselonanyň” öňki hüjümçisi Lionel Messi 2008/2009 möwsüminiň Çempionlar ligasynyň finalynda “Mançester Ýunaýtediň” derwezesine kelle bilen salan goluny karýerasynda iň gowy görýän goly hasaplaýandygyny aýtdy. Oýun ispan toparynyň 2:0 hasabynda utmagy bilen tamamlandy.
“Men, ähtimal, has owadan we gymmatly bolup biljek köp goly geçirdim, ýöne Çempionlar ligasynyň “Mançester Ýunaýted” bilen final oýnundaky kelle bilen salan golum hemişe gowy görýänimdi” – diýip, argentinaly foxsportsasia.com bilen söhbetdeşlikde aýtdy.
Futbolçy Edwin wan der Saryň goran derwezesine 70-nji minutda gol geçirdi. Şol duşuşykda birinji goly oýnuň 10-njy minutynda Samuel Eto’O girizipdi.
“Şol wagt men kelle bilen geçirerin diýip göz öňüne getirmek kyndy – ýanymda Rio Ferdinand bardy, ýöne meni hiç kim saklamady. Oýun merkeze geldi we men ony almak üçin şol ýere bardym. Hawi topy bereninden soň, ol howada wagty men ony nädip derwezä gönükdirýändigimi göz öňüne getirdim we Hudaýa şükür, men muny başardym. Bu hemmetaraplaýyn – hem topar üçin, hem meniň üçin iň möhüm we gowy görýän golum boldy” – diýip, Messi aýtdy.
Şeýle-de, ol 2006-njy ýylda şikes sebäpli Çempionlar ligasynyň finalyna gatnaşyp bilmändigini, şonuň üçin 2009-njy ýylyň aýgytly oýnuna gatnaşmagyň we geçirilen goluň özi üçin aýratyn ähmiýetli bolandygyny sözüniň üstüne goşdy.
“Bu gol biziň mümkin bolan ähli zady gazanan ajaýyp möwsümimizi jemledi” – diýip, futbolçy belledi.
Şol möwsümde “Barselona” baş tälimçi Hosep Gwardiolanyň ýolbaşçylygynda Çempionlar ligasyndan başga-da, Ispaniýanyň çempionatyny we Kubogyny utdy.
