Build 2025 konferensiýasynda Microsoft korporasiýasy emeli aňyň kömegi bilen ylmy gözlegleri çaltlaşdyrmak üçin döredilen Discovery platformasyny hödürledi. Kompaniýanyň maglumatlaryna görä, täze ulgam maglumatlary seljermekden we çaklamalary öňe sürmekden başlap, tejribeleri modelirlemäge we netijeleri gaýtadan işlemäge çenli ylmy gözlegiň ähli tapgyrlarynda kömek eder.
Platforma alymlara EA agentleriniň topary bilen hyzmatdaşlykda işlemäge mümkinçilik berýär. Korporasiýanyň pikiriçe, bu superkompýuterleri we täze EA modelleri ulanmagyň hasabyna ylmy gözlegleriň takyklygyny, tizligini we masştabyny artdyrar.
Anons umumy tendensiýany dowam etdirýär. 2025-nji ýylyň başynda Google pikir döretmek we tejribeleri meýilnamalaşdyrmak üçin niýetlenen “AI-awtordaşy” hödürledi. Şeýle taslamalary Anthropic, OpenAI, FutureHouse we Lila Sciences ýaly kompaniýalar hem ösdürýär.
Şol bir wagtyň özünde ylmy gözlegçileriň arasynda şübhe saklanýar. Esasy sebäp – häzirki EA ulgamlarynyň ygtybarlylygynyň çäkli bolmagydyr. Hünärmenleriň pikiriçe, şeýle gurallar maglumatlaryň uly göwrümini işlemegi we mümkin bolan çözgütleri saýlamagy başarýar, ýöne adaty däl pikirlenmäge we hakykatdan täze pikirleri döretmäge ukyply däl.
2023-nji ýylda Google öz GNoME ulgamy bilen 40 töweregi täze materialyň açylandygyny habar berdi, ýöne garaşsyz barlag bu açyşlaryň täzedigini tassyklamady. Dermanlary taýýarlamakda EA ulanan Exscientia we BenevolentAI kompaniýalary hem kliniki synaglardan üstünlikli geçip bilmedi.
Microsoft kompaniýasy Discovery-nyň ylmy prosesiň çylşyrymlylygyny göz öňünde tutup, öňki çözgütlerden has ygtybarly netije görkezmegine umyt bildirýär.
