Dünýädäki iň uly ro-ro görnüşli gämi «SAIC Group-yň» golçur kompaniýasynyň flotuna goşuldy. 15-nji maýda gämi Hytaýdan Ýewropa tarap ilkinji saparyna ugrady diýip, «ITHome» portaly habar berýär.
Ägirt «Anji Ansheng» awtoparomy bir gatnawda 9500 awtoulag daşap bilýär.
Bu gämi «SAIC Anji Logistics» flotunyň düzümindäki 35-nji gämi boldy. Bu flot awtoulaglary daşamak boýunça Hytaýdaky iň uly toplumlaýyn logistika ulgamy hasaplanylýar.
«Anji Logistics» awtoulag daşamak üçin Hytaýda ilkinji bolup awtonom flot döreden kompaniýadyr. Bu flotda jemi 35 gämi bar: 11 derýa gämisi, 9 içerki söwda üçin niýetlenen umman gämisi we 15 daşary ýurt söwdasy üçin niýetlenen umman gämisi.
Kompaniýanyň meýilnamasyna görä, 2026-njy ýyla çenli daşary ýurt söwdasy üçin niýetlenen gämileriň sany 22-ä ýetiriler. Gämi ugurlary Günbatar Ýewropany, Ortaýer deňzini, Meksikany, Günorta Amerikanyň günbatar bölegini, Günorta-Gündogar Aziýany, Awstraliýany, Täze Zelandiýany, Ýakyn Gündogary we hytaý awtoulaglarynyň eksporty üçin beýleki möhüm sebitleri öz içine alar.
«Anji Ansheng» peýda bolmazdan ozal, iň uly ro-ro görnüşli gämi derejesi «BYD Shenzhen» awtoparomyna degişlidi. Ol bir gatnawda 9200 awtoulag daşaýar.
