Toyota kompaniýasy «Lunar Cruiser» atly Aý roweriniň ilkinji açyk synaglaryny geçirdi. Rower Ýaponiýanyň JAXA we ABŞ-nyň NASA agentlikleri bilen hyzmatdaşlykda işlenip düzülýär. Taslama «Land Cruiser» modeline esaslanýar we geljekki «Artemis» missiýalary üçin ulanyljak ulag hökmünde 2019-njy ýyldan bäri kämilleşdirilýär diýip, «autoevolution» habar berýär.
Rower Aýyň ýüzünde 10 müň kilometre çenli ýol geçip biler. Ol içindäki astronawtlary daşky gurşawdan gorap, skafandrsyz kislorod bilen üpjün eder. Güýç ulgamy hökmünde «Toyota Mirai» esasynda işlenip düzülen wodorod tehnologiýasy göz öňünde tutulýar. «Lunar Cruiser» iki astronawt üçin niýetlenendir, emma zerurlyk ýüze çyksa dört adama çenli ýerleşip biler.
Resmi uçurylyşy 2032-nji ýyldan öň bolmaz we bu «Artemis VII» missiýasynyň çäginde amala aşyrylar. NASA eýýämden JAXA bilen bilelikdäki operasiýa üçin şertnama baglaşdy. Bu taslamanyň geljekde diňe kosmosda däl, eýsem Ýerdäki wodorodly ulaglaryň täze nesilleriniň işlenip düzülmegine hem uly täsir ýetirmegine garaşylýar.
