Islam Mahaçew ýarym orta agrama geçenden soň, ýeňil diwizionda UFC-niň çempion tituly erkin boldy. Guşagyň täze eýesi 29-njy iýunda Paradaýs amerikan şäherinde (Las-Wegasyň bir bölegi, Newada ştaty) kesgitlener. UFC 317 ýaryşynyň esasy söweşinde titul üçin öňki iki çempion – gruziýaly Iliýa Topuriýa we braziliýaly Çarlz Oliweýra göreşer.
28 ýaşly Topuriýa ozal ýarym ýeňil agram kategoriýasynda (66 kg çenli) çykyş etdi. Ol hem Mahaçew ýaly öz diwizionynda tituly boşadyp, agramyny ýokarlandyrdy. Çempion guşagyny gruziýaly söweşiji 2024-nji ýylyň fewral aýynda UFC 298-de awstraliýaly Aleksandr Wolkanowskini nokauta düşürenden soň gazandy. Soňra Abu-Dabide geçirilen UFC 308-de amerikaly Maks Holloueýe garşy söweşde tituly üstünlikli gorady. Onuň hasabynda 16 ýeňiş bolup, bir ýeňliş hem ýokdur.
Çarlz Oliweýra öň ýeňil agramda titula eýeçilik edýärdi, ýöne 2022-nji ýylda Mahaçewe garşy söweşde guşagyny aldyrdy. Ol özüniň soňky söweşini 2024-nji ýylyň noýabrynda UFC 309-da geçirip, emin agzalarynyň biragyzdan karary bilen Maýkl Çendleri ýeňdi. 35 ýaşly braziliýalynyň hasabynda 35 ýeňiş we 9 ýeňliş bar, ýene bir söweş geçirilmedik diýlip hasaplandy.
UFC 317 ýaryşynyň ýene bir esasy söweşi iň ýeňil agramda titul üçin braziliýaly çempion Aleşandre Pantoža (29-5) bilen Täze Zelandiýadan dalaşgär Kaý Kara-Fransyň (25-11) söweşi bolar. Esasy kardyň çäklerinde ýeňil agramda asly Eýrandan amerikaly Beneil Dariuş (22-6-1) we braziliýaly Renato Moýkano Karneýro (20-6-1) söweşer.
