Amerikaly Belal Muhammad awstraliýaly Jek Della Maddalena bilen söweşde ýarym orta agramda Absolýut söweş çempionatynyň (UFC) çempion titulyny gorap bilmedi.
Monrealda geçirilen UFC 315 ýaryşyndaky söweş emin agzalarynyň biragyzdan karar bermeginde Maddalenanyň peýdasyna tamamlandy.
Muhammad 36 ýaşynda. Ol UFC-niň çempion titulyny 2024-nji ýylyň iýul aýynda britaniýaly Leon Edwardsy eminleriň biragyzdan karar bermeginde ýeňmek bilen gazanypdy. Muhammad çempion guşagynyň ilkinji goragyny geçirdi. Indi onuň hasabynda garyşyk başa-baş söweşde (MMA) 24 ýeňiş bilen 4 ýeňliş bar.
28 ýaşly Maddalena MMA-da 18 ýeňiş gazandy we 2 ýeňlişe sezewar boldy. Ol UFC-niň howandarlygynda geçirilen 8 söweşiň ählisinde ýeňiji boldy.
Ozal habar berlişi ýaly, Muhammad – Maddalena söweşiniň netijesi russiýaly Islam Mahaçewiň indiki söweşi kime garşy geçirjekdigini kesgitlemelidi. ABC ispan gazetiniň maglumatlaryna görä, amerikaly Belal Muhammad ýeňiş gazanan ýagdaýynda, Mahaçew çempion titulyny goramak üçin ýeňil agram derejesinde galmalydy, onuň garşydaşy bolsa Ispaniýanyň wekili Iliýa Topuriýa bolmalydy. Ýöne eger Maddalena guşagyň eýesi bolsa, onda russiýaly söweşiji ýarym orta agramda çempion ady üçin awstraliýaly bilen söweşmelidi.
