Sportico neşiri ähli döwürleriň we halklaryň maliýe taýdan iň üstünlikli 50 türgeniniň sanawyny çap etdi. Sanawda amerikaly basketbolçy Maýkl Jordan birinji orny eýeledi.
Neşiriň habar bermegine görä, Jordan karýerasynda hümmetsizlenmäni hasaba almak bilen, takmynan, 4,15 milliard dollar gazandy. Hümmetsizlenmäni göz öňünde tutmasaň, girdejisi 3 milliard dollardyr. Bu beýleki türgenlerden ep-esli köp. Deňeşdirmek üçin, sanawdaky indiki iň köp girdejili amerikaly golfçy Taýger Wuds 2,79 milliard dollar, ilkinji üçlügi ýapýan portugaliýaly futbolçy Kriştianu Ronaldu bolsa 2,23 milliard dollar gazandy. Ikisi hem sport karýeralaryny dowam etdirýärler.
Şeýle hem ilkinji bäşlige basketbolçy Lebron Jeýms (hümmetsizlenmäni hasaba almak bilen, 1,88 milliard dollar) we argentinaly Lionel Messi (1,85 milliard dollar) girdi.
Ilkinji onluga ABŞ-ly golfçylar Arnold Palmer bilen Jek Niklaus, britaniýaly futbolçy Dewid Bekhem, şweýsariýaly tennisçi Rojer Federer we amerikaly boksçy Floýd Meýwezer girdi.
Ýaryş sürüjileriniň arasynda iň gowusy nemes piloty Mihael Şumaher boldy. Onuň girdejisi 1,39 milliard dollar diýip hasaplandy. Ol 12-nji ýeri eýeledi.
40-njy orunda barýan tennisçi Serena Uilýams sanawdaky ýeke-täk zenandyr.
50 türgeniň umumy girdejisi 53,2 milliard dollar boldy. Sanawda sekiz sportuň wekilleri bar.
