Skandinaw daglarynyň iň beýik nokady bolan Gallhýopiggen dagyndaky ereýän buzlugy emeli garyň kömegi bilen halas etmek teklip edildi. Buzluk her ýyl 1 mln kubometr gar ýitirýär, onuň galyňlygy bolsa eýýäm 20-25 metre çenli azaldy. Eger degişli çäreler görülmese, ol ýene sekiz ýyldan ýok bolup biler diýip, NRK habar berýär.
Dag lyžasy merkeziniň baş direktory Per Arne Wole buzlugy saklamak üçin her ýyl 700 müň kubometr emeli garyň gerekdigini aýtdy. Ol gar önümçiligi boýunça täze stansiýa merkeze 2050-nji ýyla çenli işlemäge mümkinçilik berer diýip hasaplaýar. Ýöne bu döwürden soň klimat çaklamalary näbelli bolup galýar.
Norwegiýanyň tebigy we tehniki ylymlar uniwersitetiniň dosenti Strand Edegord emeli garyň buzlugy köpeldip biljekdigini, ýöne onuň wagtlaýyn bolup, ereme möhletini birneme yza süýşürip biljekdigini belledi. NRK-nyň maglumatlaryna görä, klimatyň üýtgemegi dag lyžasy merkeziniň işini kynlaşdyryp, soňky ýyllarda Norwegiýadaky soňky beýik dag buzlugyny saklamak üçin gymmat çäreleri görmäge mejbur etdi.
Syýahatçylyk pudagy we dag lyžasynyň höwesjeňleri bu pikiri goldaýar. Pudagyň wekilleri emeli garyň önümçiligi üçin 11 mln krona ýygnamagy meýilleşdirýär.
