ABŞ-nyň Tehas ştatynda ýerleşýän Hennessey kompaniýasy köpçülikleýin ýollarda sürmek üçin niýetlenen dünýäniň iň güýçli benzinli awtoulagyny – «Venom F5 Evolution» modelini hödürledi.
Kämilleşdirilen «ýyrtyjy» 6,6 litrlik twin-turbo V8 hereketlendiriji bilen enjamlaşdyrylan. Ol 2031 at güýjüni öndürýär we 1960 Nm tork bilen üpjün edýär.
«Onuň hatda tektonik plitalary süýşürmäge ýeterlik derejede kuwwaty bar» — diýip, «TopGear» neşiri ýazýar.
Awtoulag sagatda 100 kilometr tizlige 2,5 sekuntdan hem az wagtda ýetýär. Iň ýokary tizligi bolsa 500 km/sag.
Kompaniýa Evolution atly toplumyny ulagy täze satyn alýanlara, şeýle-de eýýäm satyn alanlara hem hödürleýär. Bu toplumyň bahasy ulagyň öz bahasyny hasaba almazdan 285 müň dollar. Toplumyň düzümine hereketlendirijiden başga-da Sport, Road, Race, Drag, Wet we F1 ýaly görnüşleri bolan uýgunlaşýan asma ulgamy hem-de IndyCar-yň hünärmenleri tarapyndan täzeden işlenip taýýarlanan aerodinamika ulgamy girýär.
