Toyota gibrid awtomobillere bolan islegiň ep-esli artmagy bilen ýüzbe-ýüz boldy, bu hem ätiýaçlyk şaýlarynyň ýetmezçiligine we garaşmagyň wagtynyň uzalmagyna getirdi. ABŞ-daky, Ýaponiýadaky, Hytaýdaky we Ýewropadaky diler merkezlerinde ulaglar öndürijiniň bazara iberip ýetişmeginden has çalt satylýar diýip, Reuters ýagdaýdan habarly iki çeşmä çalgylanyp habar berýär.
LMC Automotive-iň maglumatlaryna görä, soňky bäş ýylda gibridleriň global satuwy tas üç esse – 5,7 milliondan 16,1 milliona çenli artdy. Ýewropada müşderiler ulaglara 60-70 gün garaşýar, bu bolsa 2020-nji ýyldakydan iki esse köpdür. Ol ýerde, esasan, Yaris Cross Hybrid we RAV4 Plug-in hybrid ulaglary uly islegden peýdalanýar.
Ýaponiýada alyjylar iki aýdan bäş aýa çenli garaşmaga taýýar. ABŞ-da gibrid Prius heniz fewral aýynda dükanlardan ýitdi, Camry bolsa çäkli mukdarda galdy. Hindistanda eltip bermegiň möhleti modele baglylykda iki aýdan dokuz aýa çenli ýetýär.
Şeýle gijikdirmeler Ýaponiýada öndürilýän gibrid güýç enjamlary üçin komponentleriň ýetmezçiligi bilen baglanyşyklydyr. Aisin Corp-dan magnit ýetmezçiligi we Denso inwertorlarynyň üpjünçiligi bilen bagly bökdençlikler önümçiligi gowşadýar.
Toyota Hindistanda başga üpjün edijileri we inwertorlary ýerli öndürmek mümkinçiligini gözden geçirýär.
