Toyota kompaniýasy «Dakar» ralli-reýdinden alan tejribesine esaslanyp, täze Hilux GR Sport II pikabyny tanyşdyrdy.
Modeliň tekerleriniň aralygy giňeldildi (+135 mm öň tarapda, +155 mm yz tarapda), ýerden beýikligi artdyryldy (323 mm) we giriş burçy gowulandyryldy (30 gradus).
Kompaniýanyň metbugat gullugynyň habaryna görä, ulag 204 at güýjüni we 500 Nm torky öndürýän 2,8 litrlik turbodizel hereketlendiriji bilen enjamlaşdyrylan. Ol 100 km/sag tizlige 10,7 sekuntda ýetýär, iň ýokary tizligi bolsa – 175 km/sag. Standart enjamlaşdyrylyşda doly herekete getiriji ulgam we A-TRC ulgamy bar.
Asma ulgamy (podweskasy) täzeden işlenip düzülen: ryçaglar güýçlendirilen, amortizatorlaryň ýeri üýtgedilen we keseligine duran stabilizator ýeňilleşdirilen. Ulagyň daşky görnüşini bolsa, agressiw bamper, 17 dýuýmlyk gara diskler, gyzyl tormoz supportlary we gara G-mesh radiator gözenegi jemleýär.
Salony sport oturgyçlar (alkantaradan), alýumin pedal, peredaçany geçiriş lepestoklary we 8 dýuým ekranly multimediýa ulgamy bilen enjamlaşdyrylan. Bu ulgam Apple CarPlay-i we Android Auto-ny goldaýar.
