Huawei 2025-nji ýylyň maý aýynda HarmonyOS ulgamyna esaslanýan ilkinji şahsy kompýuteri hödürlejekdigini habar berdi. Bu barada Huawei-de Consumer Business Group-yň we Intelligent Automotive Solutions-yň ýerine ýetiriji müdiri we ýolbaşçysy Ýuý Çendun aýtdy. Bu ädim Huawei ekoulgamynda barha köp enjam kategoriýalaryny gurşap alýan HarmonyOS-yň mundan beýläk-de ösdüriljekdigini aňladýar.
Maglumatlara görä, PK we noutbuklar üçin HarmonyOS-yň interfeýsi operasion ulgamyň mobil görnüşinden birneme tapawutlanar. Ekranyň ýokarky böleginde ulgam maglumatlaryny, habarnamalary we dolandyryş parametrini görkezýän status paneli ýerleşdiriler. Ekranyň aşagynda hem ulgam, hem beýleki programmalary öz içine alýan dok-panel peýda bolar. Şeýle-de, HarmonyOS dürli ululykdaky ekranlar üçin optimizirlenen wijetler toplumyny hödürlär, bu hem dürli görnüşli enjamlarda iş rahatlygyny üpjün eder.
Häzirlikçe PK-nyň ýa-da noutbugyň haýsy modeliniň ilkinji bolup HarmonyOS-y aljakdygy habar berilmedi. Ýöne gurluşyň diňe natiw programmalara niýetlenen OS wersiýasynda – HarmonyOS Next-de işlejekdigi belli. Bu täze OS-a eýe bolan kompýuterleriň öňki nesil mobil programma üpjünçiligini işledip bilmejekdigini aňladýar.
Häzirki wagtda Huawei MateBook hatarynyň noutbuklary Windows-da işleýär. ABŞ-nyň sanksiýalaryna garamazdan, kompaniýa Microsoft bilen hyzmatdaşlygyny dowam etdirýän az sanly hytaý korporasiýalarynyň biri bolmagynda galýar. Ýöne geljekde kompaniýanyň öz OS-yny ösdürmegi, amerikan programma üpjünçiliginden ýüz öwürmekde möhüm ädim bolup biler.
Şol bir wagtyň özünde, OS-yň täze wersiýasy köne ykjam goşundylary goldamaýar, bu bolsa onuň halkara bazaryna uýgunlaşmagyny kynlaşdyryp biler. Ähtimal, Huawei beýleki ýurtlarda Windows noutbuklaryny satmagyny dowam etdirse gerek. Goşmaça maglumatlar maý aýynda gurluş resmi taýdan çykandan soň belli bolar.
